ابابا ابابا
ابغينا اخروف بقرونو
السمونية باينة في اعيونو
يكون اكبير ومزيان
باش انفوح على اولاد الجيران
ابابا
يكون صردي وامعلف
وعلى ازردتو ما نتخلف
عنداك القطبان والشواية
والتفوار غايتو غاية
ابابا
لا تنسى افيخرات ولعطور
في لغدى ولعشى وافطور
نبداوها بالضوارة والكرشة
حتى انعمر هذه الطحشة
ابنتي ابنتي
الله يهديك ابنتي العزيزة
انجيب اخريفة ولا امعيزة
نمشيوا على قد الجيب
بكلامك مرضتي لقليب
ابابا ابابا
ديما بكلامك تفقسني
وجوابك ديما يهوسني
غير هذا المرة يا بابا لعزيز
اطلق الغبشة والتعنزيز
ابنتي ابنتي
الله يهديك ابنتي
راه افهمت كل ما قلتي
الايام اتحنت اللي ما يحنت
والمسكين ابحالي منها ما يفلت
احنا في عصر الابادة
كل ساعة فيها زيادة
شللها واغسلها راس لمحاين
والزيادة اتقطع ليها لفران
اطقال لحمل اعليا
ما عارف يديا من رجليا
الله يجعل تاويل الخير
ومشكلتي ما القيت ليها تفسير
ابابا ابابا
راس لمحاين غير اسحابة
ا بالماء والشطابة
الله سبحانه يعلم
بكلامك اشحال تنتالم
ابنتي يا بنتي
كل مرة واتجيني نوبة
صبحات الايام مقلوبة
الماء والضوء ولكرا
هذه قصة اخرى
.
الشاعر والزجال الزموري مصطفى امزيل
.
الادبية المغربية
.
